حمد باری تعالیٰ

ہو تیری قدرت کیابیاں
عاجز ہے انساں کی زباں

ہیں تیری عظمت کے نشاں
کوہ و زمین و آسماں

تیری کرشمہ سازیاں
صحرا میں ہیں چشمے رواں

یہ مہر و ماہ و کہکشاں
دشت و بیاباں، گلستاں

آب رواں، سنگِ گراں
آیات ہیں تیری عیاں

انسان کی مجبوریاں
مہجوریاں، معذوریاں

خیرالوریٰ محبوب ہے
قرآن ہے تیرا بیاں

گاہے تو شہ رگ کے قریں
گاہے ورائے لامکاں

(ندیم نیازی)

نعت رسول مقبول صلی اللہ علیہ وآلہ وسلم

شافع حشر، شاهِ جہاں مصطفی^(ص)
دونوں عالم میں ہیں حکمراں مصطفی^(ص)

رابطہ بن گئے، واسطہ بن گئے
عبد و معبود کے درمیاں مصطفی^(ص)

وہ مزمل بھی ہیں وہ مدثر بھی ہیں
پردہ پوش غمِ عاصیاں مصطفی^(ص)

نام یٰسین کچھ سب سبب تو نہیں
دل کی تسکین ہیں بے گماں مصطفی^(ص)

یہ بشر کیا ہیں تجھ پر ملائیک نثار
یہ زمیں کیا ہے خمِ آسماں مصطفی^(ص)

تن پہ کہنہ رِدا اور تاج شہی
ٹھوکروں میں تری دو جہاں مصطفی^(ص)

ایک عجمی میں اتنی جسارت کہاں
ہو مبارک ترا مدح خواں مصطفی^(ص)

(مبارک مونگیری)