اداریہ:-حقوق-نسواں-کا-عالمی-دن-مارچ-2023-ماہنامہ-دحتران-اسلام

ہر سال 8 مارچ کو حقوق نسواں کے عالمی دن کے طور پر منایا جاتاہے۔ سرکاری و غیر سرکاری تنظیمیں، تحریکیں، جماعتیں خواتین کے حقوق کے تحفظ اور اس ضمن میں عوامی شعور بیدار کرنے کے لئے ریلیاں نکالتے، سیمینارز اور کانفرنسز منعقد کرتے ہیں۔ کچھ تحریکیں یا این جی اوز خواتین کو ایک انتہائی مظلوم اور بے بس مخلوق کے طور پر پیش کرتے ہیں۔ ان این جی اوز کے بارے میں مزید بات کرنے سے بہتر ہو گا کہ خواتین کے حقوق و فرائض کے متعلق آئین پاکستان اور اسلامی تعلیمات اور سوسائٹی کے رویوں پر روشنی ڈالی جائے۔ اس امر میں کوئی شبہ نہیں کہ آئین پاکستان میں خواتین کو عام شہری سے زیادہ حقوق اور تحفظ دینے کی بات کی ہے مگر جس طرح انسانی حقوق کے باب میں تحفظ کی گارنٹیاں دی گئی ہیں اور ان پر عملدرآمد نہیں ہوتا۔ مثال کے طور پر آئین فوری انصاف کی فراہمی کی بات کرتا ہے مگر فوری انصاف دستیاب نہیں ہے۔ آئین آزادی اظہار کا تحفظ کرتا ہے مگر زمین پر آئین کی روح کے مطابق یہ تحفظ نظر نہیں آتا۔ آئین 6 سے 16 سال کی عمر کے ہر بچے کو لازمی فراہم کرنے کی بات کرتا ہے مگر زمین پر ایسا کچھ نظر نہیں آتا۔ آج بھی اڑھائی سے 3کروڑ بچے سکولوں سے باہر ہیں اور جبری یا رضاکارانہ مشقت کا شکار ہیں۔ اسی طرح آئین بلدیاتی انتخابات کی بات کرتا ہے مگر پچھلے 40 سال کا تجربہ بتاتا ہے کہ حکومتیں بلدیاتی انتخابات کے انعقاد سے راہ فرار کے راستے تلاش کرتی ہیں۔ آئین کاآرٹیکل 38 ہر قسم کے استحصال کے خاتمے کی بات کرتا ہے مگر عام آدمی کو خالص دودھ، خالص ادویات یہاں تک کہ خالص پانی کے نام پر لوٹا جاتا ہے اور ببانگ دہل عام آدمی کا مالی استحصال کیا جاتا ہے۔ اسی طرح آئین فرد کی سلامتی، فیئر ٹرائل، جبری مشقت کے خاتمے کی بات کرتا ہے مگر یہ آلائشیں پوری طاقت اور حقیقت کے ساتھ ہمارے دائیں بائیں موجود ہیں۔ آئین کا آرٹیکل 63 قومی زندگی میں عورتوں کی مکمل شمولیت کی بات کرتا ہے مگر ہمیں اس پر عملدرآمد ہوتا ہوا نظر نہیں آتا۔ عملدرآمد نہ ہونے کا معاملہ صرف عورتوں تک محدود نہیں ہے مرد، بچے، بوڑھے بھی اس کی زد میں آتے ہیں تو اس لئے صرف خواتین کے بارے میں مہم چلانا کہ اس کا بطور خاص استحصال کیا جاتا ہے حقائق پر مبنی نہیں ہے۔ صنف نازک ہونے کی حیثیت سے اور مالی خودمختاری کے معاملے میں مردوں سے کم درجہ پر ہونے کی وجہ سے عورت کو امتیازی رویوں کا سامنا کرنا پڑتا ہے لیکن ایسا ہرگز نہیں ہے کہ آئین، قانون کی نظر میں خواتین کم ترہیں۔ ہم ہر سال اس بات پر زور دیتے ہیں کہ رویوں کو تبدیل کرنے کی ضرورت ہے۔ رویے تعلیم اور تربیت کو فروغ دینےسے تبدیل ہوں گے، عوامی سطح پر تعزیری لب و لہجہ اختیار کرنے سے کچھ تبدیل نہیں ہو گا۔ اس سے انتشار اور خلفشار بڑھے گی۔ عورت کے نام پر اپنے احتجاج اور ریلیوں کو سجانا بھی ایک طرح کا عورت کا جذباتی استحصال ہے کیونکہ ایسی ریلیوں سے خواتین کی حالت زار تبدیل ہوتی ہوئی نظر نہیں آئی۔ زیر نظر تحریر کے ذریعے ہم عوامی سطح پر خواتین کے حقوق کی آواز بلند کرنے والی خواتین اور تحریکوں سے کہتے ہیں کہ وہ آئین اور قانون میں عورت کو دئیے گئے حقوق پر عملدرآمد کے حوالے سے شعور کو اجاگر کریں اور اسلام نے خواتین کو جو عزت و تکریم اور حقوق دئیے ہیں اس کو دنیا کے سامنے رول ماڈل کے طور پر پیش کیا جائے۔ اسلام وہ واحد الہامی ضابطہ حیات ہے جس نے ویمن امپاورمنٹ کے لئے خواتین کو وراثت میں حصہ دار بنایا۔ دنیا کا کوئی آئین، کوئی ضابطہ حیات کوئی مذہب ایسا نہیں ہے جس نے ویمن امپاورمنٹ کے لئے عملی اقدامات اٹھائے ہوں۔ زمانہ جاہلیت میں عورت کو کسی چیز کی مالک بننے کا حق حاصل نہیں تھا، عورتوں کے لئے کوئی وراثت نہیں تھی، عورت کو خرید و فروخت کی چیز سمجھا جاتا تھا، اسلام نے ان جاہلانہ رسومات اور عورت کے استحصال کا خاتمہ کیا۔ سورہ النسا میں عورت کے معاشی حقوق کو تحفظ دیتے ہوئے اللہ رب العزت نے فرمایا ’’اے ایمان والو !تم کو یہ بات حلال نہیں کہ عورتوں کے (مال یا جان کے) جبراً مالک ہو جاؤ‘‘۔ ویمن امپاورمنٹ اور عزت و تکریم کا یہ اعلان کسی انسان کی طرف سے نہیں مالک کائنات کی طرف سے ہے۔

اداریہ: حقوق نسواں کا عالمی دن