نعت بحضور سرورِ کونین صلی اللہ علیہ وآلہ وسلم

  1. سرورق
  2. ماہنامہ منہاج القرآن
  3. جون 2008ء

ریاض حسین چودھری

درِ حضور کی شامِ بہار دے سورج ہوائے زر کو زرِ انکسار دے سورج طلوع ہوتا ہے آقا کی چوم کر چوکھٹ تمام عمر ادب سے گذار دے سورج یقیں دلائے مدینے کی صبحِ روشن کا ہزار بار شبِ انتظار دے سورج بیاضِ نعت کے ریشم گلے میں ڈالوں گا کروڑہا مجھے کرنوں کے ہار دے سورج میں اس برس بھی لکھوں نعتِ مرسلِ آخر ورق ورق پہ ادب کے اتار دے سورج مرے خدا، بڑی ہی مختصر طلب ہے مری مرے قلم کو سخن کے ہزار دے سورج مرے خدا، مجھے لکھنا ہے نعت کا مطلع لُغت کا اور بھی چہرہ نکھار دے سورج یہ میرے آئینہ خانے کے عکس کہتے ہیں غبارِ شہر نبی بار بار دے سورج شعاعِ زرد کے سکّے تمام کھوٹے ہیں شعاعِ سبز کو بھی اقتدار دے سورج ضمیر جن کا ہے روشن غبارِ طیبہ سے مرے قلم کو وہ، پروردگار، دے سورج عَلَم درود کا لے کر جو نکلی ہیں کلیاں ہر ایک کو سندِ افتخار دے سورج طفیلِ سیدِ سادات ہر زمانے کو شعورِ ندرتِ مدحت نگار دے سورج ریاض تشنہ لبی کا یہی مداوا ہے حروفِ نعت کا اک آبشار دے سورج