حمد باری تعالیٰ جل جلالہ
(شہزاد مجددی)
قرآن کی زبان میں ہوں محوِ گفتگو اِیّاکَ نَعْبُدُ
گویا ہوئے ہیں عابد و معبود روبرو اِیّاکَ نَعْبُدُ
حاضر ہوں دست بستہ تری بارگاہ میں، لے لے پناہ میں
آیا ہوں کرکے آج میں اشکوں سے پھر وضو اِیّاکَ نَعْبُدُ
سب رحم کرنے والوں سے بڑھ کر ہے تو رحیم اے قادرِ کریم
بھر دے مئے فیوض سے میرا بھی اب سبو اِیّاکَ نَعْبُدُ
تجھ کو ہے میرے باطنی احوال کی خبر اے خالقِ بصر
تجھ پر عیاں خلوص مرا میری جستجو اِیّاکَ نَعْبُدُ
درکار پھر ہے روح کو تطہیر کا عمل اے ربِّ لم یزل
پھر قلب کو عطا ہو وہی ذوقِ آرزو اِیّاکَ نَعْبُدُ
دشت و چمن میں تیری ہی قدرت کے رنگ ہیں سب لوگ دنگ ہیں
جاری ہے ہر گھڑی تری رحمت کی آبجو اِیّاکَ نَعْبُدُ
کیا یہ اسمِ ذات کے حرفوں میں نور ہے کیف و سرور ہے
مستی میں جھوم جائے ہے ہر موجہءِ لہو اِیّاکَ نَعْبُدُ
سجدے کو بے قرار تھی شہزاد کی جبیں اے اصلِ ہر حسیں
جونہی سنا تھا امر ترا اس نے ’’اُسْجُدُوْا‘‘اِیّاکَ نَعْبُدُ
نعت بحضور سرور کونین صلی اللہ علیہ وآلہ وسلم
(شمس کاشمیری)
مرے محسن آقا تیری گلیوں پہ نثار
مری سب عقل و خرد لے کے ملے مجھ کو جنوں
چوم لوں راہیں جہاں پڑتے رہے تیرے قدم
اپنی پلکوں سے ترے شہر کی خاشاک چنوں
ترے قدموں کے نشاں پاکے اُحد پہ آقا
اُن پہ ہونٹوں سے میں اپنا بھی کہیں نام لکھوں
مٹی میں موجود تو ہوگی ترے جوتوں کی دھنک
اُس کو آنکھوں پہ لگاؤں کبھی چہرے پہ ملوں
لپٹوں دیواروں سے جن میں ہو مجسم موجود
مجھ کو حسرت ہے یہیں جان تڑپ کر دے دوں
تِرے منبر، تِری مسجد، تِری قُربت سے ملے
مجھ کو کچھ ایسا جنوں ہوش میں پھر آ نہ سکوں
کر عطا آقا! مجھے اپنی غلامی کا سرور
تاکہ اوروں کی غلامی سے میں آزاد رہوں
میں گداگر ہوں تِرے دَر کا شہہ کون و مکاں
جیسا آیا ہوں تِرے در سے نہ ویسا لوٹوں
رستہ دشوار ہے اور شمس مسافر تنہا
آسرا آپ کا مل جائے تو بے خوف چلوں