القرآن - اطاعتِ رسول ﷺ اور قرآن مجید کے اسالیبِ بیان

اللہ رب العزت نے ارشاد فرمایا:

قُلْ اَطِیْعُوا اللّٰهَ وَ الرَّسُوْلَ.

(آل عمران، 3: 32)

’’آپ فرما دیں کہ اللہ اور رسول (صلی اللہ علیہ وآلہ وسلم) کی اطاعت کرو۔ ‘‘

دوسرے مقام پر ارشاد فرمایا:

یٰٓاَیُّھَا الَّذِیۡنَ اٰمَنُوۡۤا اَطِیۡعُوا اللّٰہَ وَ اَطِیۡعُوا الرَّسُوۡلَ.

(النساء، 4: 59)

’’اے ایمان والو! اللہ کی اطاعت کرو اور رسول (صلی اللہ علیہ وآلہ وسلم) کی اطاعت کرو۔ ‘‘

مذکورہ آیات میں اللہ تعالیٰ اور اللہ تعالیٰ کے رسول دونوں کی اطاعت کا ذکر آیا ہے۔ جب دو کا ذکر آتا ہے تو درمیان میں ’و‘ آتی ہے، جس کا اردو میں ترجمہ ’’اور‘‘ ہے۔ اس ’’واؤ‘‘ کو ’’واؤ عاطفہ‘‘ کہتے ہیں۔ اس سے معطوف کا معطوف علیہ پر عطف واقع ہوتا ہے۔ اللہ تعالیٰ اور اللہ تعالیٰ کے رسول کی اطاعت کے باب میں قرآن مجید میں واؤ عاطفہ دو طرح وارد ہوئی ہے یعنی یہ عطف دو شکلوں میں ہوا ہے:
1۔ ایک عطف اس طرح ہوا ہے کہ اسمِ رسول کا عطف اسمِ اللہ پر ہوا ہے۔ جس طرح مذکورہ پہلی آیت؛ اَطِیۡعُوا اللّٰہَ وَ اَطِیۡعُوا الرَّسُوۡلَ. میں ہے۔ اسے عربی میں عطف إسم الرسول علیٰ إسم اﷲ تعالیٰ کہتے ہیں کہ اسم ’رسول‘ کا عطف اسم ’اللہ‘ پر واقع ہوا ہے۔

2۔ واؤ عاطفہ کی دوسری شکل یہ ہے کہ اطاعتِ رسول کا عطف اطاعتِ الٰہی پر ہوا ہے جس طرح مذکورہ دوسری آیت؛ یٰٓاَیُّھَا الَّذِیْنَ اٰمَنُوْٓا اَطِیْعُوا اللّٰهَ وَاَطِیْعُوا الرَّسُوْلَ میں ہے۔ گویا ایک آیت میں لفظ ’رسول‘ کا عطف لفظ ’اللہ‘ پر ہے اور دوسری آیت میں اطاعتِ رسول کا عطف اطاعتِ الٰہی پر واقع ہوا ہے۔

صاف ظاہر ہے کہ ان دو طرح کے عطف کے وارد ہونے کی بھی کوئی حقیقت، افادیت اور حکمت ہے۔ قرآن مجید میں جب بھی کوئی اسلوب اختیار کیا جاتا ہے یا اسلوب تبدیل کیا جاتا ہے تو وہ خالی از حکمت نہیں ہوتا بلکہ ہر ایک اسلوب کوئی نہ کوئی حکمت اور معنویت اپنے اندر سموئے ہوئے ہوتا ہے۔ یہ ہماری زبان کی طرح نہیں ہے کہ ہم جس طرح چاہیں بیان کر دیں اور اُس کا کوئی خاص معنی اور مراد نہ ہو۔ اللہ تعالیٰ کا کلام اس امر سے پاک ہے۔

آیئے! عطف کی ان دونوں قسموں اور شکلوں پر غور کرتے ہیں کہ ان میں کیا حکمت اور افادیت کار فرما ہے:

1. اطاعتِ رسول ﷺ کے باب میں قرآن مجید کا پہلا اسلوبِ بیان اور اس کے فوائد:

اطاعتِ رسول کے باب میں قرآن مجید کا پہلا اسلوبِ بیان یہ ہے کہ اسمِ ’رسول‘ کا اسمِ ’اللہ‘ پر عطف واقع ہوتا ہے۔ اس حوالے سے قرآن مجید میں کئی آیات وارد ہیں۔ چند آیات ملاحظہ ہوں:

1. قُلْ اَطِیْعُوا اللّٰهَ وَ الرَّسُوْلَ.

 (آل عمران، 3: 32)

’’آپ فرما دیں کہ اللہ اور رسول (صلی اللہ علیہ وآلہ وسلم) کی اطاعت کرو۔ ‘‘

اس آیت میں أطیعوا کا لفظ ایک بار آیا ہے، رسول کے لیے یہ لفظ دوبارہ نہیں آیا۔ گویا اسم ’الرسول‘ کا عطف اسم ’اللہ‘ پر ہوگیا۔

2. وَ اَطِیۡعُوا اللّٰہَ وَ رَسُوۡلَہٗۤ.

(الأنفال، 8: 1)

’’اور اللہ اور اُس کے رسول ﷺ کی اطاعت کیا کرو۔ ‘‘

3. وَ اَقِمۡنَ الصَّلٰوۃَ وَ اٰتِیۡنَ الزَّکٰوۃَ وَ اَطِعۡنَ اللّٰہَ وَ رَسُوۡلَہٗ ؕ

(الأحزاب، 33: 33)

’’اور نماز قائم رکھنا اور زکوٰۃ دیتے رہنا اور اللہ اور اس کے رسول (صلی اللہ علیہ وآلہ وسلم) کی اطاعت گزاری میں رہنا۔ ‘‘

4. وَ مَنۡ یُّطِعِ اللّٰہَ وَ رَسُوۡلَہٗ.

(الأحزاب، 33: 71)

’’ اور جو شخص اللہ اور اس کے رسول (صلی اللہ علیہ وآلہ وسلم) کی فرمانبرداری کرتا ہے۔ ‘‘

5. وَ اِنۡ تُطِیۡعُوا اللّٰہَ وَ رَسُوۡلَہٗ لَا یَلِتۡکُمۡ مِّنۡ اَعۡمَالِکُمۡ شَیۡئًا ؕ اِنَّ اللّٰہَ غَفُوۡرٌ رَّحِیۡمٌ.

(الحجرات، 49:14)

’’اور اگر تم اللہ اور اس کے رسول (صلی اللہ علیہ وآلہ وسلم) کی اطاعت کرو تو وہ تمہارے اعمال (کے ثواب میں) سے کچھ بھی کم نہیں کرے گا، بیشک اللہ بہت بخشنے والا بہت رحم فرمانے والا ہے۔ ‘‘

مذکورہ آیات پانچ مختلف صیغوں کے ساتھ بیان ہوئی ہیں اور ان میں سے ہر ایک آیت میں ’الرسول‘ کا عطف لفظ ’اللہ‘ پر ہے۔ ان آیات میں لفظ أطیعوا کو ’’رسول‘‘ کے لیے دوبارہ بیان نہیں کیا بلکہ اللہ تعالیٰ اور رسول پر أطیعوا کا حکم ایک ہی بار وارد ہوا ہے کہ اللہ تعالیٰ اور اُس کے رسول ﷺ کی اطاعت کرو۔ یہ اسلوب درج ذیل فوائد کا حامل ہے:

(1) ہر وہ امر جس میں اللہ کی اطاعت واجب ہے، اس امر میں رسول کی اطاعت بھی واجب ہے

اس اسلوب سے پہلا شرعی، قرآنی، اعتقادی اور فقہی فائدہ یہ حاصل ہوا کہ جس جس شے اور امر میں اللہ تعالیٰ کی اطاعت واجب ہے، اُسی اُسی شے اور امر میں رسول ﷺ کی اطاعت بھی واجب ہے۔ اب ہم یہ نہیں کر سکتے کہ نماز کے معاملات ہوں تو اللہ تعالیٰ کے حکم کو ماننا واجب ہو اور رسول ﷺ کا حکم نہ مانا جائے یا نماز، روزہ، حج، زکٰوۃ کے لیے رسول ﷺ کی اطاعت مان لی جائے اور باقی معاملات کے لیے اللہ تعالیٰ کے حکم کو مانا جائے۔ اس طرح نہیں کریں گے۔ قرآن مجید کے اس اسلوبِ عطف نے اس تفریق کی جڑ کاٹ دی ہے۔ یہ سمجھنا کہ زندگی کے تمام امور میں اللہ تعالیٰ کی اطاعت کرنا واجب ہے اور رسول اکرم ﷺ کے احکام اور احادیث و سنت کی اطاعت واجب نہیں یا بعض امور کے لیے اطاعت واجب ہے اور بعض کے لیے نہیں، یہ تفریق نہیں کی جاسکتی۔ اس تفریق کا جو امکان ہو سکتا تھا، اس اسلوب کے ذریعے اُس کی جڑ کاٹ دی گئی۔ اس لیے کہ اللہ تعالیٰ پر أطیعوا کا جو حکم آیا، اُسی أطیعوا کے ساتھ ہی الرسول آیا ہے۔ لہٰذا اطاعت کے دائرے کو الگ الگ نہیں کر سکتے کہ اللہ تعالیٰ کی اطاعت اور قرآن مجید کے احکام کو ماننے کا دائرہ وسیع کر دیں اور رسول ﷺ کے احکام اور احادیث و سنت کو حجت ماننے کا دائرہ تنگ کر دیں یا انھیں صرف اُس دور یا محدود امور کے لیے مختص کر دیں۔ نہیں، ایسا کرنا جائز نہیں۔ قرآن مجید کے اس اسلوب کے ذریعے محدودیت بھی نہ رہی اور توقیت بھی نہ رہی۔

اس حوالے سے یہ امر بھی نہایت قابلِ غور ہے کہ قرآن مجید کے مذکورہ تمام مقامات جن میں ’’الرسول‘‘ کا عطف ’اللہ‘ پر آیا ہے، اگر ہم ان کے سیاق و سباق کا مطالعہ کریں تو یہ امر سامنے آتا ہے کہ حکمِ اطاعت صرف عبادات کے لیے مختص نہیں ہے بلکہ کہیں امن و جنگ کے احکام میں اطاعت کا ذکر ہے، کہیں مالِ غنائم اور لین دین کے معاملات میں اطاعت کا ذکر ہے، کہیں ریاستی پالیسی کی بات میں اطاعت کا حکم ہے۔ کہیں نجی، خاندانی و عائلی معاملات کی بات میں اطاعت کا حکم ہے۔ کہیں معاملات اور مالیات کی بات میں اطاعت کا حکم ہے۔ کہیں بین الاقوامی امور کی بات میں اطاعت کا حکم ہے، کہیں مصالح عامۃ یعنی سوسائٹی کے حقوق کی بات میں اطاعت کا حکم ہے۔

جب ان امور میں اطاعت کا حکم آیا ہے تو اللہ تعالیٰ اور رسول ﷺ دونوں کے لیے ایک ہی مرتبہ أطیعوا وارد ہوا ہے۔ اس سے یہ بات واضح ہو گئی کہ اطاعت کا حکم خواہ اللہ تعالیٰ کے لیے ہو یا رسول ﷺ کے لیے، یہ صرف عبادات کے لیے مختص نہیں ہے بلکہ معاملات، حالتِ امن و جنگ، جنگی قوانین، عامۃ الناس کے مصالح، حقوق اور فرائض و واجبات میں بھی رسول ﷺ کی اطاعت اُسی طرح واجب ہے جیسے اللہ تعالیٰ کی اطاعت واجب ہے۔ حتیٰ کہ جمیع دینی، اخروی اور دنیوی امور میں اللہ تعالیٰ اور اُس کے رسول ﷺ کی اطاعت یکساں واجب ہے اور اُن میں تفریق نہیں کی گئی۔ اگر اس میں تفریق کرنا چاہیں گے تو یہ قرآن مجید پر اپنی عقل اور رائے کو معاذ اللہ غالب کرنا قرار پائے گا اور ایسا کرنا کفر ہے۔

قرآن مجید میں فقط اللہ تعالیٰ کی اطاعت کا ذکر کہیں نہیں کیا گیا۔ کسی بھی معاملے میں خواہ وہ عبادات کا معاملہ ہو یا مالیات، اخلاقیات اور اقوام و ملل کا معاملہ ہو، بین الاقوامی، ملکی، سوشل، سیاسی، معاشی یا ثقافتی امور کا معاملہ ہو یا کوئی بھی معاملہ، اللہ رب العزت نے قرآن مجید میں کہیں فقط اللہ تعالیٰ کی اطاعت یا قرآن کے حکم کی اطاعت کا اکیلے ذکر نہیں کیا۔ قرآن مجید میں یا تو اللہ تعالیٰ اور اس کے رسول ﷺ کی اطاعت کا یکجا ذکر موجود ہے یا صرف اکیلے رسول ﷺ کی اطاعت کا ذکر کیا ہے۔ (ہم تفصیل کے ساتھ اس مضمون کے سابقہ حصوں میں اس امر کا مطالعہ کرچکے ہیں) لہٰذا اب یہ تفریق کیسے قائم کر سکتے ہیں کہ اللہ تعالیٰ کی اطاعت تو تمام امور میں واجب ہوگی مگر رسول ﷺ کا حکم، حدیث اور سنت فلاں امور میں ہوگی اور فلاں امور میں نہیں ہوگی۔ پورے قرآن مجید میں اس تفریق کی گنجائش ہی نہیں ہے۔

(2) اللہ تعالیٰ اور اس کے رسول ﷺ کی اطاعت حقیقت میں ایک ہی اطاعت ہے

قرآن مجید میں جہاں بھی اسم ’’رسول‘‘ کا عطف اسمِ جلالت ’’اللہ‘‘ پر قائم ہے اور أطیعوا کو ایک مرتبہ ذکر کر کے دونوں اسمائے گرامی آئے ہیں تو اُس سے یہ ثابت کرنا بھی مقصود ہے کہ اللہ تعالیٰ اور رسول ﷺ کی اطاعت حقیقت میں ایک ہی اطاعت ہے۔ یہ دو الگ الگ اطاعتیں نہیں ہیں کہ کوئی رسول ﷺ کی اطاعت کا انکار کر کے یہ سمجھ لے کہ اس نے صرف رسول ﷺ کی اطاعت کا انکار کیا ہے مگر اللہ تعالیٰ کی اطاعت پر تو عقیدہ قائم ہے۔ اگر رسول ﷺ کی اطاعت، حکم، حدیث و سنت کے حجت ہونے کا انکار ہوگیا تو ازخود حکمِ الٰہی کی حجیت کا انکار ہوگیا اور ایسا کر کے اس نے حکمِ الٰہی کے واجب ہونے کو رد کر دیا۔ واؤ عاطفہ کے ذریعے اللہ رب العزت نے دونوں اطاعتوں کو ایک اطاعت قرار دیا اور اُنہیں امرِ واحد بنا دیا۔ یہ اسلوب وحدتِ طاعتین یعنی دو اطاعتوں کی وحدت اور عینیت پر دلالت کرتا ہے کہ دونوں اطاعتیں جمیع امور میں عین یک دیگر ہیں۔

2۔ اطاعتِ رسول کے باب میں قرآن مجید کا دوسرا اسلوبِ بیان اور اس کے فوائد

اللہ تعالیٰ اور اس کے رسول ﷺ کی اطاعت کے باب میں قرآن مجید کا دوسرا اسلوب یہ ہے کہ اطاعتِ رسول کا عطف اطاعتِ الٰہی پر قائم کیا گیا ہے۔ یعنی اطاعت کا اطاعت پر عطف ہے۔ اس حوالے سے بھی قرآن مجید میں کئی آیات وارد ہیں۔ چند آیات ملاحظہ ہوں:

1. یٰٓاَیُّھَا الَّذِیۡنَ اٰمَنُوۡۤا اَطِیۡعُوا اللّٰہَ وَ اَطِیۡعُوا الرَّسُوۡلَ وَ اُولِی الۡاَمۡرِ مِنۡکُمۡ ۚ فَاِنۡ تَنَازَعۡتُمۡ فِیۡ شَیۡءٍ فَرُدُّوۡہُ اِلَی اللّٰہِ وَ الرَّسُوۡلِ.

(النساء، 4: 59)

’’ اے ایمان والو! اللہ کی اطاعت کرو اور رسول (صلی اللہ علیہ وآلہ وسلم) کی اطاعت کرو اوراپنے میں سے (اہلِ حق) صاحبانِ اَمر کی، پھر اگر کسی مسئلہ میں تم باہم اختلاف کرو تو اسے (حتمی فیصلہ کے لئے) اللہ اور رسول (صلی اللہ علیہ وآلہ وسلم) کی طرف لوٹا دو۔ ‘‘

یہاں اَطِیْعُوا کا امر اللہ تعالیٰ کے لیے الگ اور رسول ﷺ کے لیے الگ بیان کیا گیا جبکہ وَاُولِی الْاَمْرِ مِنْکُمْ کو تابع کر دیا، اُن کے لیے اطیعوا کو مکرر نہیں کیا۔ یعنی اَطِیۡعُوا اللّٰہَ وَ اَطِیۡعُوا الرَّسُوۡلَ کو ایک درجہ بنا دیا اور اُولِی الْاَمْرِ مِنْکُمْ کے لیے أطیعوا کے حکم کو بیان نہ کر کے ایک الگ درجہ بنا دیا۔ پھر فَرُدُّوْہُ اِلَی اللّٰهِ وَالرَّسُوْلِ فرماکر دوبارہ اللہ تعالیٰ کے حکم اور رسول ﷺ کے حکم کو ایک درجہ میں رکھ دیا اور اولی الامر کو یہاں بیان نہیں کیا۔ اس اسلوب سے یہ واضح کرنا مقصود ہے کہ اولی الامر سے تم اختلاف کر سکتے ہو مگر اللہ تعالیٰ کے رسول ﷺ سے اختلاف نہیں کر سکتے۔ اللہ تعالیٰ کے رسول ﷺ سے اختلاف اُسی طرح نہیں کیا جا سکتا جیسے کہ اللہ تعالیٰ کے حکم سے اختلاف نہیں کیا جاسکتا۔

اس آیت میں یہ بات بھی نہایت قابلِ غور ہے کہ اَطِیْعُوا اللّٰهَ وَ اَطِیْعُوا الرَّسُوْلَ میں لفظ أطیعوا کو دوہرایا تا کہ اس کا ایک تصور واضح ہو جائے اور جب اختلاف اور تنازعہ کے معاملے میں حتمی فیصلہ لینے کی باری آئی تو فرمایا کہ فَرُدُّوْہٗ (اسے لوٹا دو)، یہاں حرفِ جار ’إلیٰ‘ کو دوبارہ بیان نہیں کیاکہ فَرُدُّوْہُ اِلَی اللّٰهِ وَ اِلیَ الرَّسُوْلِ. اگر یوں کہہ دیا جاتا کہ اللہ تعالیٰ کی طرف رجوع کرو اور اللہ تعالیٰ کے رسول ﷺ کی طرف رجوع کرو تو معنی یہ ہوتا کہ اللہ تعالیٰ کی طرف رجوع کچھ اور ہے اور رسول ﷺ کی طرف رجوع کرنا کچھ اور ہے۔ اس لیے حرفِ جار ’’الیٰ‘‘ کو دوبارہ لانے کے بجائے واؤ عاطفہ لگا دیا اور لفظِ رسول کا عطف لفظِ اللہ تعالیٰ پر قائم کر دیا تا کہ اللہ تعالیٰ اور اس کے رسول ﷺ کی طرف رجوع ایک ہی تصور ہوجائے۔ رجوع میں وحدت اور عینیت ہے۔ رسول ﷺ کی طرف رجوع کرنے کا معنی ہی یہ ہے کہ اللہ تعالیٰ کی طرف رجوع کرنا۔ اللہ تعالیٰ کی طرف رجوع اور رسول ﷺ کی طرف رجوع یہ دو الگ رجوع نہیں ہیں بلکہ ان میں وحدت ہے۔ پس اس آیت میں اطیعوا اللہ واطیعوا الرسول کے ذریعے بھی عطف کی ایک شکل بیان کردی اور فردوہ الی اللہ والرسول کے ذریعے عطف کی دوسری قسم بیان کر دی۔

اسی اسلوب پر دیگر آیات یہ ہیں:

2. وَ اَطِیْعُوا اللّٰهَ وَ اَطِیْعُوا الرَّسُوْلَ وَ احْذَرُوْا ۚ

(المائدۃ، 5: 92)

’’اور تم اللہ کی اطاعت کرو اور رسول (صلی اللہ علیہ وآلہ وسلم) کی اطاعت کرو اور (خدا اور رسول صلی اللہ علیہ وآلہ وسلم کی مخالفت سے) بچتے رہو۔ ‘‘

3. قُلۡ اَطِیۡعُوا اللّٰہَ وَ اَطِیۡعُوا الرَّسُوۡلَ ۚ

(النور، 24: 54)

’’ فرما دیجئے: تم اللہ کی اطاعت کرو اور رسول (صلی اللہ علیہ وآلہ وسلم) کی اطاعت کرو۔ ‘‘

4. یٰۤاَیُّهَا الَّذِیْنَ اٰمَنُوْۤا اَطِیْعُوا اللّٰهَ وَ اَطِیْعُوا الرَّسُوْلَ وَ لَا تُبْطِلُوْۤا اَعْمَالَكُمْ۝

(محمد، 47: 33)

’’اے ایمان والو! تم اللہ کی اطاعت کیا کرو اور رسول (صلی اللہ علیہ وآلہ وسلم) کی اطاعت کیا کرو اور اپنے اعمال برباد مت کرو۔ ‘‘

یعنی رسول کی اطاعت کے انکار کرنے سے تمہارے اعمال برباد ہو جائیں گے اور اعمال کا کلیتاً تباہ ہو جانا یہ کفر کی علامت ہے۔

5. یَقُوۡلُوۡنَ یٰلَیۡتَنَاۤ اَطَعۡنَا اللّٰہَ وَ اَطَعۡنَا الرَّسُوۡلَا.

(الأحزاب، 33: 66)

’’وہ کہیں گے: اے کاش! ہم نے اللہ کی اطاعت کی ہوتی اور ہم نے رسول (صلی اللہ علیہ وآلہ وسلم) کی اطاعت کی ہوتی۔ ‘‘

مذکورہ آیات میں اطاعت کے باب میں اطاعت کا عطف اطاعت پر ہورہا ہے۔ جیسے پہلے اسلوب کے اعتقادی فوائد ہیں، اسی طرح یہ اسلوب بھی افادیت و حکمت کا حامل ہے۔ ائمہ، محدثین، امام حجر عسقلانی، امام قسطلانی، امام نووی اور دیگر اکابر ائمہ نے اس پر بحث کی ہے۔ ذیل میں اس اسلوب کے اعتقادی فوائد ملاحظہ ہوں:

(1) اطاعتِ رسول ایک مستقل اطاعت ہے:

اس اسلوب کا پہلا فائدہ یہ ہے کہ اس سے استقلالِ طاعت الرسول یعنی اطاعتِ رسول کے مستقل اور مطلق ہونے کا ثبوت ملتا ہے۔ یعنی جس طرح اَطِیْعُوا اﷲَ کا حکم الگ دیا کہ اللہ کی اطاعت کرو تو جو حیثیت ایک مستقل اطاعت ہونے کی اطاعتِ الٰہی کو حاصل ہے، وہی حیثیت، درجہ اور ماہیت اطاعتِ رسول کی ہے۔ یہ بھی اُسی طرح مستقل ہے، عارضی نہیں ہے، جیسے اللہ تعالیٰ کی اطاعت مستقل ہے، عارضی نہیں ہے۔ حافظ ابن حجر عسقلانی نے فتح الباری میں سورۃ النسآء کی آیت 59 کی تفسیر میں یہ نکتہ بیان کیا ہے۔ یہی نکتہ امام طیبی (شارح مشکوٰۃ) نے بیان کیا اور حافظ ابن حجر عسقلانی نے بھی امام طیبی کو نقل کیاہے۔

امام عسقلانی کہتے ہیں کہ إعاد الفعل یعنی اَطِیْعُوا اللّٰهَ کے بعد اَطِیْعُوا الرَّسُوْلَ کی صورت میں جو فعل کا اعادہ کیا گیا یہاں اس امر کی طرف اشارہ ہے کہ رسول کی اطاعت بھی مستقل ہے۔ اولی امر میں اس کو نہیں دوہرایا گیا۔ یہ اس بات کا اشارہ ہے کہ اس میں ایسے امور بھی شامل ہیں کہ اگر اولی الامر اللہ تعالیٰ اور اس کے رسول ﷺ کی اطاعت نہ کریں تو پھر اُن کے احکام کی اطاعت واجب نہیں ہوتی۔ یہ فرق کرنے کے لیے وہاں فعل کا اعادہ نہیں کیا۔