حمد باری تعالیٰ
یہ فصلِ گل بھی تِری، گلستان بھی تِرا
خزاں بھی تیری ہے، دشتِ تپاں بھی تیرا ہے
یہ مہر و ماہ درخشاں، یہ انجم و پرویں
یہ کہکشاں بھی تِری، آسماں بھی تیرا ہے
محیطِ عرش سے تا فرش ہیں تِرے جلوے
وُہ لامکاں بھی تِرا، یہ مکاں بھی تیرا ہے
یہ گردِ راہ کے ذرّے، یہ پُرفشاں لمحے
زمیں تیری ہے یاربّ، زماں بھی تیرا ہے
یہ تپتی راہ گزر، یہ شجر شجر سایہ
یہ دھوپ بھی ہے تِری، سائباں بھی تیرا ہے
ہزار نغموں سے بہتر تلاوتِ قرآں
یہ حسنِ صوت، یہ سحرِ بیاں بھی تیرا ہے
کہاں نہیں تِری آیت ہے بزمِ گیتی میں
یہ آنکھ بھی تِری، یہ سماں بھی تیرا ہے
یہ بے کنار سمندر، یہ کشتیٔ ہستی
یہ ناخدا تِرا، بادباں بھی تیرا ہے
تِرے حضور بجز اس کے کیا کہے افسرؔ
یہ حمد بھی ہے تِری، حمد خواں بھی تیرا ہے
{افسر ماہ پوری)
نعتِ رسولِ مقبول ﷺ
ہر دور کا ہادی ہے تو پیکرِ قرآنی
تو رحمتِ عالم ہے تو جلوۂ رحمانی
یہ بات زمانے میں ہے باعثِ حیرانی
کی تیرے فقیروں نے عُسرت میں جہاں بانی
ہر ذرہ چمک اٹھا خاکِ عربستاں کا
صحرائوں نے دیکھی ہے ایثار کی طغیانی
آمد تری، انساں کی تاریخ کا سرمایہ
ممنونِ کرم تیری درویشی و سلطانی
ڈھایا ہے نہتوں نے شاہوں کے عزائم کو
تھی قوتِ ربانی وہ بے سرو سامانی
رستے پہ ترے چل کر ہر شخص نے دیکھا ہے
دنیا کے سفر میں ہے آسانی ہی آسانی
بنیاد جو اس کی ہے نامِ شہِؐ بطحا پر
ہے میرے گلستاں میں خوشبو کی فراوانی
اس نورِ مجسم کے جلوئوں میں نظر گم ہے
ہے جوہرِ آئینہ حسرت مری حیرانی
{حسرت حسین حسرت}