حمد باری تعالیٰ - تیری شان جل جلالہ
ہے تُو ہی نہاں ، ہے تو ہی عیاں ، تری شان جل جلالہ
تُو کہاں نہیں ، نہیں تُو کہاں ، تری شان جل جلالہ
ترے نور ہی کا ظہور ہیں ، یہ جو جن و انس و طیور ہیں
یہ شجر حجر ، یہ زمیں زماں ، تری شان جل جلالہ
تُو ہی ڈوبتوں کا سہارا ہے ، تُو ہی بحر غم کا کنارا ہے
تُو ہی بے کسوں کا ہے پاسباں ، تری شان جل جلالہ
تری فکر مذہبِ صادقاں ، تری یاد جوہرِ عاشقاں
ترا ذکر مسلکِ عارفاں ، تری شان جل جلالہ
یہی رنگ دیکھ کے دنگ ہے ، جسے کچھ شعور ہے ، ڈھنگ ہے
تُو ہی راز ہے ، تو ہی راز داں ، تری شان جل جلالہ
ہے ترا کرم ہی چمن چمن ، ہے تری عطا ہی روش روش
ہے تُو ہی تو خلق کا مہرباں ، تری شان جل جلالہ
ہے ترا ہی نور یہاں وہاں ، ترا آستاں ہے ہر آستاں
ہے جبھی تو خم سرِ عاشقاں ، تری شان جل جلالہ
بہزاد لکھنوی